^{گەورەترین ئاگری دارستان لە مێژووی بەلجیکا هەزاران هێکتار زەوی سووتاند}

بەلجیکا ڕووبەڕووی گەورەترین ئاگری دارستان بووەتەوە کە تا ئێستا لە وڵاتەکە تۆمار کراوە. ئاگرەکە لە ناوچە پارێزراوە سروشتییەکەی های فێنس لە ڕۆژهەڵاتی بەلجیکا، نزیک سنووری ئەڵمانیا، نزیکەی ٣ هەزار هێکتار زەوی و دارستانی سووتاندووە.

ئاگرەکە لە ڕۆژی هەینی ١٤ی ئاب لە ناوچەی Baelen دەستی پێکرد. بەپێی دوایین ڕاگەیاندنی فەرمی پارێزگای لیێژ لە شەوی ١٦ی ئاب، ئاگرەکە هێشتا بە تەواوی کۆنترۆڵ نەکرابوو و هەزاران هێکتار ناوچەی سروشتیی خستبووە ژێر مەترسی.

نزیکەی ٦٠٠ کەس لە دانیشتووانی ناوچەکانی Waimes و Bütgenbach ناچار کران ماڵەکانیان چۆڵ بکەن، دوای ئەوەی ئاراستەی با گۆڕا و دووکەڵ و ئاگر بەرەو ناوچە نیشتەجێبووەکان بڵاو بووەوە.

زیاتر لە ٢٥٠ فریاکەوتنکار و ئاگرکوژێنەر بەشداری هەوڵەکانی کۆنترۆڵکردنی ئاگرەکە دەکەن. هەروەها ئەڵمانیا، لوکسەمبورگ و هۆڵەندا یارمەتییان ناردووە و یەکێتی ئەوروپا چەند هەلیکۆپتەر و فڕۆکەی تایبەت بە کوژاندنەوەی ئاگر خستووەتە خزمەت بەلجیکا.

وشکیی زەوی و پلەی بەرزی گەرما لە بەشێکی زۆری ئەوروپا، مەترسی بڵاوبوونەوەی ئاگری دارستانەکانی زیاد کردووە. کاربەدەستان هۆشداری دەدەن کە گۆڕانی ئاراستەی با و دۆخی وشکی ناوچەکە هەوڵەکانی کۆنترۆڵکردنی ئاگرەکە ئاڵۆزتر دەکات.