^{١٦ هاووڵاتیی کورد لە مەهاباد بە زیاتر لە ٧٧ ساڵ زیندان سزا دران}

بەپێی ڕاپۆرتی ڕێکخراوی مافی مرۆڤی هەنگاو و کۆڵبەرنیوز، دادگای شۆڕشی مەهاباد حوکمی زیندان بەسەر ١٦ هاووڵاتیی کورددا سەپاندووە کە کۆی سزا ڕاگەیەنراوەکانیان بە ٧٧ ساڵ و ٩ مانگ زیندان هەژمار کراوە.

بەپێی هەمان سەرچاوانە، ئەم کەسانە لە کۆتایی ساڵی ٢٠٢٤ لەلایەن هێزە ئەمنییەکانی ئێرانەوە لە مەهاباد دەستگیر کرابوون و دواتر بۆ ناوەندی دەزگای ئیتلاعات لە ورمێ گواسترابوونەوە بۆ لێکۆڵینەوە.

تۆمەتەکان بریتی بوون لە «کۆبوونەوە و هاودەستی»، ئەندامێتی یان پەیوەندی بە لایەنە ئۆپۆزسیۆنەکان، «پڕوپاگەندە دژی دەوڵەت» و چالاکی لە تۆڕە کۆمەڵایەتییەکان بۆ پشتگیری لە لایەنە دژبەرەکانی حکومەت.

لە نێوان حوکمەکاندا، عەبدوڵڵا هۆشمەند و عەبدولڕەحمان قوە هەر یەکەیان بە حەوت ساڵ و یەک مانگ زیندان سزا دراون. هەروەها ژمارەیەک لە تۆمەتبارەکان حوکمی پێنج ساڵ زیندانیان بەسەردا سەپێنراوە و بۆ دوو کەسی دیکەش حوکمی دوو ساڵ و پێنج مانگ زیندان ڕاگەیەنراوە.

ڕاپۆرتەکانی مافی مرۆڤ دەڵێن لە ماوەی دەستبەسەرکردنیاندا ئەم کەسانە لە دەستڕاگەیشتن بە پارێزەر، پەیوەندی تەلەفۆنی و سەردانی خێزان بێبەش کراون. تا ئێستا وردەکارییەکانی ئەم حوکمانە بە شێوەیەکی سەربەخۆ لەلایەن دەزگاکانی فەرمی ئێرانەوە پشتڕاست نەکراوەتەوە.